Dat kannst mi glööven!
Eigentlich bün ick ganz änners; ick kaom man nich faoken dortau

vun Peter Kossen

To'n Anhören hier klicken:
Lesen deit Peter Kossen.

"Eigentlich bün ick ganz änners; ick kaom man nich faoken dortau." Ödön von Horvath hett dat seggt. "Eigentlich bün ick ganz änners…" — Karneval is vörbi. Einfach maol ganz änners wän — frei un frech, bliede un sörglos. Aschermiddewäken un dei säben Wäken lange Fassentied, dat is dei Tied, ganz änners tau wän. "Denk doran, du büs Stoff; un taun Stoff gaihst du torügg!", so hört dei Christ, wenn üm vandaoge dat Aschenkrüz up 'n Vörkopp teikt wett. "Denk doran, du büs Stoff…"

Läben is Sickinstuderen in 'n Dod. Dorüm is jede Dag so väl wert. "Eigentlich bün ick ganz änners; ick kaom man nich faoken dortau." — Nu kumm man dortau, is hoge Tied! Wer still un wäs änners, kumm tau di sülwes! Faoken seggt änner Lüe, wie ick wän un nich wän draff, wat ick daun un laoten schall. Fassen hölpt dei Waohrheit veklaoren, uck dei Waohrheit äöwer mien Läben. Wor ick unfrei bün un fassesitt, dor kaom ick mit Fassen lichter dör 't Lock. An Aschermiddewäken un Karfreidag ät Katholiken kien Fleisch. Wecke vezicht jeden Freidag dorup un ehrt dormit Jesus Christus, dei sick opfert un sien Läben gäben hett, Fleisch un Blaut. 'n freiwillig einfachet Äten minnert Gier un Giez, lett upmarken för Not un för dei Waohrheit.

'n Deil van dei Waohrheit is dei moderne Sklaoverei in us Land. Mensken wert untützt at 't leiper nich gaiht. Ehre Würde wett intuschket gägen 'n Almosen. So is et an 'n masse Stäen inne Fleischindustrie — un nich bloß dor. Billig mott dei Arbeit wän. Billig is duraobel. Man dat billige Fleisch het 'n hoogen Pries: Mensken wert veschläten, upbrukt un dann wegschmäten. Un sei köänt d´ nich gägen an.

Dorüm, leiwe Tauhörers: "Kien Billigfleisch inne Fassentied!" Dat hebbt ji nich nödig, dat gaiht änners un bäter! Aschermiddewäken hölpt us denken: "Eigentlich bün ick ganz änners; ick kaom man nich faoken dortau." Laot us wat änners maoken, gerechter! Un wi schölt seihn: Dat Leipe beholt nich dat lessde Wort, wenn et uck aowermächtig schinnt. Dei Fassentied bring dat Gaue an 'n Toch, dat Gaue, dat Gott in jedenein anleg hett. Fassentied is 'n Fräujaohr för dei Sääle. Du draffs dei wern, dei du büs un wän wullt. Un dei Mitmenschk, dei Frömde, draff dat uck! Gott kump di intaumöte. Laot dat torügg, wat di un änner Lüe unfrei maokt. Un maok mit bi: "Kien Billigfleisch inne Fassentied!"

Bi us up plattpartu.de finnt man nu utsöchte Bidräge van disse Radiosendung.