tosamendragen vun Gertrud Everding, Adeline Decker un Ewald Eden

Folg 1
Folg 2
Folg 3

Bi't Opstahn

Wat heff ik Sünnerliches dröömt, leve Gott!
Ik kann dat gor nich verstahn.
Nu vergeet ik dat ok al.
Worüm is dat so?
Du weetst allens, seggt Mama.
Du weetst also ok, wat ik drööm,
un ok, wenn ik mal bang bün in'n Droom.
Bi di is allens bewohrt,
ok wat ik vergeten do.
Ik föhl mi so licht,
as weer ik sülven en lütt Droom
in dien grote, sachte Hand.

Amen.

Morgens

Leve Gott, du schenkst uns
düssen schönen Dag,
du behöödst un lenkst uns
deep bet in de Nacht.
Ik nehm ja dien Geschenken
so geern un freu mi an!
Help du mi ok bedenken,
wo ik Freud geven kann.

Amen.

Mien leve Gott

Ik bün man blots so'n lüttje Deern,
un du büst doch so groot.
Vadder un Mudder heff ik so geern,
Grootvadder is al doot.
He geiht na'n Heben, hett he seggt,
un nu is he bi di.
De Heben, so wiet as he reckt,
dat is en Droom för mi.

Ik bün ok geern hier op de Eer,
och leve Gott, ik segg di Dank
för Broder, Süster, Hund un Katt,
mien ganzes Leven lang.
Schick mi dien Engels för den Dag
un laat mi nich alleen.
De hollen bi mi jümmers Wach.
En betern gifft dat keen.

Amen.

Meddags

De een hett Hunger un hett keen Broot,
de anner hett Broot un mag nich eten.
Wi hebbt Hunger, un wi hebbt Broot.
Laat uns dat Danken nich vergeten!

To Beddegahnstied

Leve Gott, du hest hüüt dien Hannen över mi utbreidt.
Dorför weet ik di Dank.
Ok wenn ik nich jümmer glücklich bün,
geiht mi dat doch good.
Leve Gott, kiek doch ok na de velen Kinner,
de dat slechter hebbt as ik!
Trööst ehr un help ehr.
Laat ehr ruhig slapen
un wat Schönes drömen,
so as mi.

Amen.