Passion 2019:
Karfreedag

vun Gertrud Everding


So dull hett Gott de Welt leevhatt! He hett uns sien eenzigen Söhn geven, dormit all de Minschen, de em vertruut, nich verlüstig gaht, sünnern dat ewig Leven hefft!
Johannes 3, Vers 16


Ik weet nich mehr, wat ik nu seggen schall. In de letzt Nacht is Petrus na Huus kamen un hett uns vertellt, Jesus is verschütt gahn. De röömschen Suldaten hefft em mitnahmen — verhaftet. Ik kunn dat sehn, Petrus harr weent, aver ik much em nix fragen. Jesus is gistern Avend in den Goorn Gethsemane beden gahn. Dree von sien Frünnen hett he mitnahmen, wi annern all sünd in't Quarteer bleven. Petrus is mit na Gethsemane west un Judas — de nich, aver de is nu doot. He hett sik ophangen an'n Boom, seggt Petrus. He hett de Schuld, meent de Mann, de de ganze Saak genau sehn hett.

Stell di mal vör, küsst hett Judas unsen Rabbi — un denn hefft de Suldaten Jesus hopp nahmen. Blots nich na den Herodes-Palast hengahn, sünst passeert uns ok noch wat. Petrus sitt in de Eck uns seggt gornix mehr. Ik weet nich, wat he beleevt hett. Nu gifft dat för uns keen Passah-Fest. Ik will ok gor nich mehr.

So, as een de Römer kennen deit, warrt se Jesus nich goot behanneln. Wat nu, wat makt se mit em?

Bi Pontius Pilatus hefft se Jesus henbröcht, seggt de Nahber. Nu is dat seker. An't Krüüz warrt se em slahn. Worüm denn dat? He hett doch nix Böses maakt? De Platz bi dat Gericht is rammelt vull. De Lüüt schreet dor as dull: An't Krüüz mit em! An't Krüüz! Un Pontius Pilatus is ok inverstahn.

Philippus meent trurig, dat gifft keeneen, de em retten kann.
Ik glööv, wie möten dor hengahn! Se murkelt em doot!, segg ik.
Ne, schreet Thomas! Büst du verrückt? Dat geiht nich! He hett Recht, wat hölpt unsen Rabbi dat, wenn wi ok noch infungen warrt! Nee nee! Hierblieven, dat is seker! Wi makt de Döör un Finster fast to. Kümmt do an de Eck nich al poor Suldaten, de uns ok verhaften wüllt? Puust blots dat Licht ut, maak de Finster dicht to, dat se uns nich finnen köönt! Wi sünd nicht to Huus.

Nahmeddag heff ik mi ruutwaagt, bit na Golgatha bün ik kamen. Nee, ik bün nich so dicht rangahn, aver ik heff dat sehn — heff em sehn. Mi was dat, as wenn he mi ankieken deit. Dat weer nich uttohollen. Allns vull mit Bloot un sien Moder stunn dor un ok Maria Magdalena un Johannes, een von siene levsten Frünnen.

Ik kunn eenfach nich to em hengahn. O Jesus, heff ik weent, mi deit dat so leed, aver ik kann nicht to dien Krüüz kamen! Ik bün so'n Bangbüx, kannst du mi dat woll vergeven? Dat weer mi, as wenn he to mi röverkeek. Nee, he kunn mi doch mang de velen Lüüd gor nich sehn — or doch ——


Biller: Rudi Witzke na Alexej Jawlensky
19.4.2019


na baven