Passion 2023
Invocavit

vun Gertrud Everding

He röppt na mi! Dorüm will ik nu tohöörn, wat he denn will.

Psalm 91, Vers 15

Ja, so is dat! Vadder höört to, wenn de Kinner schreet. Aver wat schreet se denn?
Kannst dat höörn?

Dat is mi, as seggt se: "Wi hefft maal wedder alln's verkehrt maakt, un ik heff di al so lang beden, Vadder! Du schast dat doch nu gau wedder repareern! Du kannst dat doch foorts maken! Du büst doch veel plietscher as ik! Un ik meen ok, dat is goot un richtig so!
Aver wenn du nu överhaupt nich deist, wat ik meen, denn kann ik nu maal nich mehr an di glöven. So weh, as mi dat deit! Denn büst du nu eben nich mehr mien leve Vadder in Heben! Woveel Maanden heff ik al beden un du hest woll de Ohrn dicht, Gott! Dor baben wo ik meen, dat du mi höörst, da is woll doch keeneen mehr. Ik bün so trurig —
Gott, büst du doot?"

Wi gaht op Karfreedag to. De Reis dörch de Passion fangt eerst an, un nu is Nadenken anseggt. Trüch to de Wöör, de Gott uns an't Hart leggt hett. Un uns Vadder in Heben, he höört uns to.