Wees fief Minuten still
21. Juli


Andacht vun Heinrich Giesen, in Platt bröcht vun Anke Nissen

Dor sä de Vadder to sien Knechten: "Haalt gau den besten Rock!"

Lukas 15, 22

Een sull disse Stell in de Bibel heel genau studeern. Dor hebbt wi mitkregen, dat de Söhn sik för sien Trüchkamen Wöör utdacht hett. As he de nu seggen will, as he vör sienen Vadder steiht, dor ünnerbrikt de sienen Söhn. He lett em nich to End snacken. He leggt siene linke Hand up den Mund vun den Söhn un he winkt mit de rechte siene Knechte: "Haalt gau den besten Rock!"

Lüüd, de gegen Jesus Christus sünd, hebbt dicke Böker vull schreven, wo Gott uns dal dwingt, dat wi vör düüster Altare kneet. Se hebbt orakelt, dat Christen ünner "Bußzwang" lieden. Wokeen so snackt, de hett Falschmünzerie bedreven. Een kann dat doch in disse Geschicht lesen. De Söhn warrt gor nich fardig mit sien Bußreed, mit sein Bußgebeet. Mirrn in warrt he ünnerbraken — un vulle Gnaad warrt em tospraken.

Wat also hinnert uns noch, em dat to seggen, wat wi seggen wullen?
Glieks wenn wi anfangt, glieks wenn wi uns endlich ergeevt, em towendt, glieks wenn wi de eersten Wöör formuleert, glieks is he dorbi to seggen: "Allens is goot. Allens. Du büst mien."

Maak to, dat is nich Tiet to'n Schamen!
Wullt du Gnade? Du sallst nehmen.
Wullt du leven? Dat sall sien.
Wullt du arven? Du warrst sehen.
Sall de Wunsch up't Hööchste gahn:
Wullt du Jesus? He is dien.


To'n Anhören hier klicken:

Lesen deit Anke Nissen in Holsteiner Platt.


15.7.2008


na baven