Befiehl du deine Wege

vun Karl-Heinz Sadewasser, Pastor i.R.


Digitalbild Rudi Witzke
Digitalbild Rudi Witzke

Hest du dei letzt Nacht gaud slapen? Männichmal geiht uns dat doch so, dat wi lang waak in't Bett liggen un nich inslapen können. Wat uns dorbi woll allens dörch den Kopp gahn kann. Grübeln un Sorgen laten uns nich tau Rauh kamen. Un von so wat kann uns ok kein Dokter un Apteiker affhelpen.

Aver dorbi füll uns pommersch Landsmann Dr. Bernhard Trittelvitz uns in't Wort un sä:
"Holl stopp, dat stimmt nich. Ik kann di en Medizin verraden, dei di bestimmt dorbi helpen kann. Dat is en olles Huusmiddel. Paster Paul Gerhard hett sik dat utdacht un dat heit: Befiehl du deine Wege".

Befiehl du deine Wege

Dr. Trittelvitz hett nachtens, wenn hei keinen Slaap fünn, dissen bekannten Choral — Vers bi Vers — langsom un liesing vör sik hen seggt.
Bi "Auf, auf, gib deinem Schmerze und Sorgen gute Nacht" kreeg hei de Ogendeckel al nich mihr up un bi den Vers "Gott sitzt im Regimente" schlööp hei so sachten in.

Dat gifft noch 'n anner Medizin gegen dat Sorgen un Grübeln. Dat is dei Bibelspruch ut Petrus sienen 1. Breif:

All juuch Sorgen smiet up em, Christus,
denn hei soorgt för juuch.

Na, dat is doch wat: Ok dien' Herrgott kümmert dat, woans di tau Maut is. Dörüm können wi em seggen, wat uns nich tau Rauh un Slaap kamen lött.

Foto: Rudi WitzkeUns Sorgen un Grübeln können wi ok 'n bäten los warden, wo wi eis einen annern Minschen wat dorvun vertellen. Wenn wi Gott un sien Leiw vertrugen liehrn, denn finn' wi dei beste Medizin gegen dei schwarden Gedanken un wi können tau Rauh kamen.

Gauden Dag!

 

Foto: Rudi Witzke
Foto: Rudi Witzke


4.11.2007


na baven