Düsse Bidrag is nu al ein paar Jahr her, awer as wi dormalen so'n schönen sünnigen Harvst harrn, will ik in düssen smuddeligen Harvst dorvun vertelln. Mäkelborg hett ja in Düütschland den mehrsten Sünnschien. Dor liggt dat ja up dei Hand ... Wien tau trecken!

Druven bi Rattey

Wenn ick "Wien" hüür, mütt ick ook an mien Kinner- un Jugendtied denken. An uns Huuswänn' wössen ein poor Wienräben, an de Westwand un an de Südwand. Hinner de Wienräben wier de Wand mit schwart Farw sträken worrn, woll üm de Wärm' bärer tau hollen. Hüüt na oewer 8o Johr is dorvon nix miehr tau seihn. Ick heww de Wiendruben giern äten, dat duuert bit hüüt hen. För mien Läben giern nasch ick Wiendruben.

Wienregal in Slott Rattey

In Rattey

Ein anner Erinnerung is mit de Konfirmatschon 1948 verbunnen. Wi wüssten, dat de Awschluss mit einen Schluck Wien ut einen Kelch verbunnen sien süll. Wien harrn wi noch nie nich tau drinken krägen. Dorher verständichten wi uns, mit de Knei deiper tau rutschen un up disse Oort bäten miehr Wien rünnerschlucken tau koenen. Doch datt güng "schön" dornäben, denn dei Wien wier ganz suur! So wier, taumindest mi, dei Wien verleidt' worrn.

In'n September stünn inn "Rostocker Blitz" disse korte Artikel: "Senioren des Reiseklubs Rostocker Jahresringe planen eine Tagesfahrt am 04.10.2010 in das nördlichste Weinanbaugebiet Deutschlands, nach Rattey im Kreis Mecklenburg-Strelitz, südlich von Friedland."

Märken-Slott Rattey

Also, för mien Läben giern nasch ick Wiendruben, ook ut denn Grund wier ick siehr daran interessiert, denn Vörschlag tau verwürklichen, na dat Schloss Rattey as dat nördlichste Wienanbuugebiet in Düütschland eine Dagesfohrt mit unsen Reiseklub 55 Plus tau maaken. Uns ierste Fohrt von de "Gemeinschaft Rostocker Johresringe" mit 39 Mitglieder un Gäst' ut Rostock bröchte uns bi schönstes Sünnenschienwerrer oewer dei Autobahn Richtung Neubrandenburg (Niebramborg/Niegenbramborg) in twei Stunnen pünktlich in dat lütte "gottvergätene" Dörp mang Hügel na Rattey an'n Südhang von dei Brohmer Barg (Brohmer Berge).

Dei Sünn spält in dei Wienstrüker bi Rattey

An uns trecken dei pläugten bruunen grooten Schlääch un ook dei mit greunende Saaten orrer awmeiht Rapsfeller vörbi. Dei Landschaften warrn ümmer hügeliger, manch ein Kupp' mit Bööm bewussen, un vääl Holten kamen vörbi mit greun un gäälbrun Bööm, allens maakt einen gediegen Indruck un lött uns oewer de Landwirtschaft staunen.

Winzer Ebert wiest uns den Gutsladen

Wi wüürn von einen fründlichen 40-jöhrigen Mann in Winzerhemd vör dat Schlott empfangen. Hei stellte sick uns as de Winzer von Rattey vör un gewünn glieks dörch sien fröhlich upschlaten Wesen uns all as gaude Tauhüüreres. Wie wullen natürlich weiten, wie de Rebstöcke hier na Mäkelborg-Strelitz kamen sünd; hei bremste uns in uns Raasch un verspröök, uns allens tau vertellen, denn hei harr von Anfang an allens mitmaakt. Doch noch bliwwt dei Fraach, wie dei Wienanbuu hierher na Mäkelborg-Strelitz kamen is.

Allein dei Upfohrt na Slott Rattey is ganz töverhaftig

Na de Wenn' führ ein Ollt-Bundsbörger dörch de Lannen, üm sick na ein Immobilie ümtauseihn. Hei führte in dit lütte Dörp, verführte sick hier un stött mit'n Pkw trüch un keek na hinnen un wüür ein Herrenhuus gewohr, nich grad schön antauseihn, doch gaud nauch, sick dat näger antauseihn.

Dei Binnenrüüm sünd schöön renoveert

Ok dei Näwengebäude von Slott Rattey sünd allerbest för dei Wienverarbeitung tau bruken

Dormit wier dei Anfang maakt — ein Taufall. Irgendwie denk ick mi, mütt hei wat mit Wienanbuu tau dauhn hebben un "Konnektschens" tau Wienanbuugers upwiesen künnen, sünst wier woll allens nich wohr worrn. Hei bekääm de Genehmigung för denn Anbuu un ook ein poor dusend Wienplanten, de hei up 3,5 ha anplanten dörfte. Ja, dörfte, denn so streng is dat in Düütschland. Dei Besitters in dei westdüütschen Wienanbuu-Länner wullen sick "nich in dei Supp spucken" laten (Konkurrenz warrd kort hollen). Doch sei gäben em von ehr "Recht" bäten aw, denn ook in de EU is allens quotiert.

Immer stüttig achter denn' Winzer ran!

Winzer Ebert

Ungefiehr 15.000 Rebstöck' dörfte hei anplanten un müsst einen privaten Winzer-Verein grünnen, de bitt 2010 an de 350 Mitglieder stark worrn is. Doch wat nützen all de Planten, wenn dortau Minschen bruukt ward, de arbeiten künnen? Vör allen ein Fachmann fählte, Winzer nöömt.
De Besitter von Boorn un Herrnhuus fünn em in denn' 40-jöhrigen arbeitslosen Dörpbewahner Ebert.

Anfangs künn dei sick kuum vörstellen, allens tau bewältigen, doch hei freute sick, disse Arbeit funnen tau hebben un sick uutprobieren tau koenen. Denn' Mann hett dei Besitter tau verdanken, wat hei uns hüüt ganz begeistert verkloren künn.

Winzer Ebert...

...verklaart ...

...den Wienbarg...

...un alle störrt sik up denn' Wien

Dei Anbuu von Wiendruben verlangt einen besünnern Boden — Lehmboden is hier in't Endmoränenland in Mäkelborg-Strelitz vörhannen. Ook dei Hügels mit ehr sanft' Hängn sünd von Natur uut dor. Ringsüm sünd groot Holt' as Schutz vör Starkwinn'. Gegen Frost wehrten sick dei Winzer ook hier mit sonne Rägennäbeldings. Sülwst gegen de Spreien un anner Krupptüüch wüürn Geräuschapparate insett, de von de Natur nich tau ünnerscheiden sünd.

In'n Wienbarg. Naja, "Barg" is överdreven!

2000 wüür anfungen un 2004 de ierst Wien awfüllt. De Pries wüür anfangs mit ca. 14 €uro per Buddel fastsett un wüür ook von de Kööpers annahmen, denn de Wien güng wech as "warm' Semmels", vertellte uns Herr Ebert.

De Wien dörf nur hier ünner denn Namen "Deutscher Landwein" verköfft warrn un kost' hüüt 10, 75 €, schmeckt gaud för uns Begriffe. De Wiendruben von Burg Stargard warrn ook in Rattey verarbeit'. För de poor Planten lohnt sick kein anner Upwand.

Winzer Ebert schenkt ut

Dei Utwahl kann sik sehn un smecken laten

2004 harr dat de Bundsrat in Berlin beschlaten — vörher wier de Wienveruurdnung ännert worrn un de Wienanbuugebiete "Stargarder Laand" üm Schlott Rattey und Burch Stargard höchst offiziell genähmigt worrn. För de Winzer in Süddüütschland sünd noch schlechte Tieden kamen, siet 2015 in de ganz' EU unbegrenzt Wien anbuut warrn dörf! So sünd hüüt schon männich Gastronomen up de Idee kamen, nur 99 Rebstrüüker antaubuugen. So gahn sei allerhand Gegenwind ut denn Wech, denn dei Gesetten gellt tomehrst eerst af 100 Rebstrüüker.

Wunnerschöne Parkanlagen achter dat Slott

Ach, ein' Bedingung för denn Wienanbuu heww ick noch vergäten — dei Sünn! Doch dei schient ook bi uns inn Nuurden, sogor mehr as sünstwo. Sei is wichtig för denn Zuckergehalt in de Druben un warrd mit de Oechslewaage määten. Wenn de Zeiger sick up 78 Grad inpendelt, denn is dat so wiet, un de Wiendruben warrn oornt. Wi koenen de Sorgen von de süddüütschen Winzers verstahn, de mit scheel' Blick up de nuurddüütschen Konkurrenten kieken. Doch de Anbuu inn flachen Land is weniger upwendich un dormit kostengünstiger. "Allens mütt sick räken!" De so nöömt Klimawandel kann ook noch wat bewirken, o Gott, o Gott! Nich uuttaudenken! Nuurddüütschlands Deipland — ein nieges Wienanbuugebiet in de EU?

"Wi sünd daför!"

Dorup nascht dei Verfater noch ein Wiendruuv

---

Översicht över de Bidrääg