Hanne(lore) Hinz taun Andenken
† 12.12.2020

Vun Behrend Böckmann


För Plattdüütsch hett sei allens dån,
is nu mit nägentig von uns gåhn,
doch œwerall blifft sei in't Land
as Treckfiedelhanne bekannt.


Hanne Hinz, Sülvstporträt as Jungdiern

Von Rostock anne Wåderkant
keem's mit drei in't Binnenland —
ok Swerin sei gaut befünn
mit väl Wåder so rundüm.

Insägent as dei Krieg güng ut,
mösst sei in dat Läben rut
un stöpselt bald denn von Swerin
dei Verbinnung nå Berlin.


Hanne 1948

Doch wieder süll't nå båben gåhn,
sei wull as Fru ehrn Mann ok ståhn
un nähm sik as Fröllein vör:
nu wardst du ok noch Injenör.

Un näbenbi dor markt sei all,
ok Kunst wier wat up jeden Fall:
sei riemelt, målt un komponiert,
hett dit un dat giern utprobiert.


Hanne 1957

Tau plägen denn ehr Mudderspråk
befünn sei as dei beste Såk
un hett denn ehr ganzet Läben
för dei plattdüütsch Språk hengäben.

Sei schrifft un riemelt up ehr Oort
hett Plattdüütsch as 'nVolkskunst wohrt,
doch dat güng nich ganz näbenbi,
sei måkt sik von ehr Arbeit frie.

Fründlich man sei ok upnähm,
in't Hus, ut dat ehr Hülp taukeem,
up'e anner Sied von'n Påpendiek,
wo dei Kulturbund harr sien Riek.

Klœnkist, Tiedung, Ünnerhollen,
allens von ehr fünn Gefollen,
alle Minschen wiern kandidel,
wenn sei süng tau ehr Treckfidel.


Hanne Hinz as Treckfiedelhanne

As Mäten von dei Wåderkant
verleet sei af un an dat Land,
un seet sei ierst in'n Kanu drin,
keem ehr't Dichten in denn Sinn.

Un villicht is't so gescheihn,
dat's 'n Barnsteen mål hett seihn,
denn sei "riemelt" uns vörstellt
in ehr digitale Welt:

"Inslaten
Schillebodt in'n Steen,
Fossil deit lüchten, künn ok
von gistern sien.
Goldsäuker an'n Strann'
grawweln mank bunte Steen
un danken denn Harwststorm."

Gedanken tau Popier so bringen,
dat's as wohre Dichtung klingen,
dat wier Hanne Hinz ehr Sträben,
so süll Plattdüütsch dörch sei läben.

Ja, ehr Plattdüütsch fünn Gefollen,
sei hett ok Ünnerricht afhollen,
un väle hemm' dit nich vergäten,
dei in ehr Abendschaul hemm' seten.

För dat, wat sei up Platt uns schreef,
sei so männig Ihrung kreech,
dei ein un anner hett denn duert,
as harr sei up ehrn Trabbi luert.


Hanne Hinz warrt 2016 in Ludwigslust mit den Gillhoff-Pries uttekent

Doch nå dei Täuwerie von Johrn
künn's ehrn eigen Trabbi fohrn,
un güng dat los tau 'nen Uptritt
dei Fidel keem in'n Trabbi mit.

Inne Wenntiet fohrt sei denn
in'n Trabbi nå denn Westen hen,
un in Ratzborg ankåmen,
hett sei von'n Sitz dei Fidel nåhmen
un treckt einmalig up dei Welt
dei Fidel för't Begräutungsgeld.

Verleiwt wier's in uns Mudderspråk
so as dat Mäten in denn Jungen —
Plattdüütsch wier ehr schönste Såk:
språken, schräben orrer sungen!
Un wi sünd uns hier ünnen wiß,
dat Platt dei Engelsspråk ok is!


Hanne 2016


Böker mit Hannes Gedichten gifft dat hier un hier

7.2.2021


na baven