Op ole Weeg un Brüchen:
De Ole Eiderkanal: Königsförde

Deel 3
vun Antje Heßler


Na Deel 1
Na Deel 2
Na Deel 4
Na Deel 5

Se köönt de Fotos per Klick vergröttern. Trüch kaamt Se denn
mit den Zurück-Knoop op de Browser-Symboolliest.


Dor flüggt de Stoff! De Treckerfohrer weet den Weg

Mit de Rathmannsdörper Slüüs harrn wi bit Klein-Königsförde de Scheitelstreck vun den Kanal tofaaten. Nu güng dat mit jede Slüüs bit Rendsborg wedder bargdaal. De Scheep harrn vun Holtenau bit Rendsborg ungefähr 10 Meter to överwinnen. In jede Slüüs wöörn se üm ca. 2,50 m anböört oder daalsenkt. Wi weern in Klein-Königsförde up den Barg ankamen.

De Scheep harrn bit dor dree Slüsen to överwinnen. Pro Slüüs duer dat tominnst 10 Minuten. Un denn müssen de Scheep, wenn de Wind nich vun de richtig Siet keem, de meist Tiet noch trocken warrn. Wi weern mit uns Auto üm Eeniges gauer. Blots de Slüüs Klein-Königsförd to finnen, dat weer gor nich so eenfach.


Is dor de Slüüs? De Kanaal blenkert dör de Telgen...


De Köh drinkt dat Water geern

Up uns Fohrt müssen wi ümmer wedder anhollen un de Lüüd na den Weg fragen. De mehrsten wüssen gor nix vun den Eiderkanal un de Slüüs. De Landstraten güngen to'n Deel dörch Feller un över Koppeln. Wi hebbt sogoor enen Trecker anhollen. De Treckerfohrer kenn sik ut, he wüss Bescheed. Wi harrn en Navigatorgerät bruken kunnt!

Toletzt hebbt wi mank dickes Gestrüpp enen Wegwieser sehn. "Alter Eiderkanal" stünn dor up. Wat weern wi froh.


De ole Treidelpadd: Wenn dat Peerd wüss, wat för harte Arbeit sien Vörfahren hier daan hebbt!
Dormalen weer de Treidelpadd keen Vergnögenspark...


An't Över

Uns Auto kunnen wi up enen lütten Parkplacken afstellen. To Foot güng dat denn up den olen Treidelpadd an dat Över vun den Kanal lang na de Slüüs vun Klein-Königsförde.

Wi weern ganz alleen, blots Peer un Kööh grasen up de Wiesch nevenan. Dat Water vun den Kanal blenker in'n warmen Sünnenschien dörch dat Gestrüpp. Wi kemen uns meist vertövert vör. Un dat sull in't Mittelöller mal de bedüdenst Waterstraat west sien?

 


Endlich! De Slüüs! Un wa prächtig!

Na annerthalv Kilometer Footweg weern wi endlich an de Slüüs. De Weg harr sik lohnt. De Slüüs is in enen goden Tostand. En wunnerbor nabute Hollänner Brüch överqueer den Kanal.


De nabuute Hollännerbrüch...


...un de ganze Slüsenanlaag

Neben de Brüch weer en Rastplacken mit en Bank ünnern Appelboom. De laad uns to'n Verhalen in. Ünner den Boom legen riepe Appeln. De hebbt wi uns smecken laten.

 

 

 

 


Histoorsche Ansicht vun düsse Slüüs


De Vagelschau-Plaan vun de "Klein Königsföhrder" Slüüs

Dorna hebbt wi uns eerst de Schautafeln vun de Slüüs ankeken. De Slüsenkamern erinnern uns an de Rathmannsdörper Slüüs. De harr aver keen Brüch. Hier weer ut dicke Holtbalken en Hollänner Brüch över de Slüüs buut. Se weer na dat ole Vörbild vun 1880 nied buut woorn. Bi de Övergaav vun de Brüüch 1988 is se sogoor bewegt woorn — dat heet, man hett se up un to maakt. Vun de Denkmalspflege "Europa Nostra" kreeg se dormals en Diplom för den gelungenen Nabu.

Vun den olen Eiderkanal sünd bi Klein-Königsförde blots noch 1 ½ km erhollen. De annern Enn sünd för den Bu vun den Kaiser-Wilhelm-Kanal benödigt worrn. Up den Restkanal tummelt sik hüüt Swaans. För Scheep weer keen Platz mehr.


Reste vun en Slüsendor un veel Aantengrütt


Brüch mit Keed — to'n Hoochhieven vun de Klappbrüch


De Weg över de Brüch


Keen Schippsverkehr, bloots Swaansverkehr

 

Deep beindruckt möken wi uns up den Trüchweg. Mit uns Auto sünd wi aver vörher noch den Barg daal na den Kaiser-Wilhelm-Kanal föhrt. Hier güng fröher mal de Straat wieder. Se weer dörch den Bu vun den niegen Kanal sotoseggen in't Water fullen. Hier weer unsen Weg to Enn, wi müssen wedder ümkehrn un över de Feldweeg trüch.

 

 


De Noord-Oostsee-Kanal seggt Adjüs!



na baven