Corona, Klopapier, Tante Meier
Dat heuert düt Johr tosomen


Also echt! Is dat de fiene ingelsche Aart?!

vun Silke Frakstein


Nich blots in Düütschland. Bi uns Nobersch — Great Britannia — stinkt dat as dull. Wegen Corona sünd de öffentlichen WCs in'n Momang dicht. Un wat mookt de Lüüd? Se schietert eenfach in de Gegend. I am shocked!

Ik stunn as lütte Deern ok mol buten un wull geern binnen op Tante Meier.
Wi harrn noch en Plumpsklo, ober al binnen in't Huus, nich mehr in'n Goorn. Tante Meier weer bi uns blitzblank un stunken hett dat ok nich. Dor stunn jümmers en Ammer mit Törf. An de Wand hung, op'n Bindfoden, dat Klopoppier. Dat weer Zeitungspoppier un sodennig weer dat nienich langwielig.

In'n Harvst kemen de Müüs rin, un mien Mudder un ik hebbt denn jümmers bannig Larm mookt.

Mien Broder hett den Ammer nienich "entleert". Woso? "Ik schiet nicht in den Ammer (dat hett he in't Büro mookt) un kipp em ok nich ut." Ik weer to lütt, also mutt Papa wedder ran, obends wenn he no Huus keem, der arme Kerl.

Un denn, jo, denn weer mal de Schoolmester krank un wi dröffen no Huus. Obers to Huus weer allens dicht. Allens?? Nee, uns lütt "Tante-Meier-Finster" weer nienich to. "Dat is so lütt, dor kann nüms dörch", hett Mudder seggt.

Na, dat wüllt wi doch mol seh'n. Also: En poor Steen ünner dat Finster stellt un trüchoors rin. Vörsichtig, ganz vörsichtig, vunwegen den Goldammer. Jo, dat geiht. Noch'n Stück wieder — un zack! dreiht sik de Deckel vun den Goldammer un ik stoh bit an de Taille in den Schiet.

MAMA — MAMA — HILFE!!!

Se keem grod üm de Eck. In'n Arm nohmen hett se mi nich. An de Riestüten heff ik wat kregen.

Un denn besinn ik mi noch op dat Teltloger in de 8. Klass an'n Plöner See. Dor geev dat een Tante Meier för Deerns un een för Jungs. Plumpsklos, klor. Söss Löcker in de Reeg.

Keeneen vun uns harr Klopoppier dorbi (Zeitung geev dat in't Teltloger ja nich). In den Tante-Emma-Loden in Plön hebbt wi dat denn köfft un verdeelt. 25 Blatt hett jeedeen kregen un denn mit Hallo no Tante Meier un dat Leed anstimmen:

Auf dem Donnerbalken
saßen zwei Gestalten
und schrien nach Klopapier, Klopapier!
Und dann kam der Dritte
und setzt sich in die Mitte
und schrie nach Klopapier, Klopapier!
Und dann kam der Vierte ……


Weer allens all mol dor.


Coronawäsch 2020


7.7.2020

 


na baven