Dat kannst mi glööven!
Ökumenisch singen

vun Pastorin Anita Christians-Albrecht un Heinrich Siefer


To'n Anhören hier klicken:


Lesen doot de Verfaters.


Anita: Segg mal, Heinrich, kann man ökumenisch singen?

Heinrich: So — Evangelsche un Kathoolsche tosaomen, meenst du?


Herr Käthe maakt al den Test: Mikrofonproov!

Anita: Ja, dat meen ik.

Heinrich: To Noot!

Anita: To Noot, du büst ja een! Nee, to Ehren van Martin Luther!

Heinrich: Büst mall?

Anita: Nee, heel un dall nich! Ik hebb dat beleevt.

Heinrich: Tosaomen singen, dat kann ik mi ja noch vörstellen, man to Ehren van Martin Luther — Evangelsche un Kathoolsche … Wor hest du dat denn beleevt?

Anita: Na, bi dat groote Luthermusical, wat nu överall in Düütschland upföhrt worrt.

Heinrich: 11 Mal in negen Städte, ja, hebb ik hört.

Anita: Genau! Un de Uptakt weer in d' Januar in Hannover. Un dor hebb ik mitsungen. 2500 Sängers un 12000, de dat sehn un höört hebben.

Heinrich: Dat kann ik mi vörstellen! Du büst ja uk evangelsche Pastorin — un singen kannst du uk ganz good.

Anita: Ja — obber dor weern uk ganz vööl kathoolsche Lüüd mit bi. Ungefähr 30 Prozent! Wat seggst nu?

Heinrich: Mmmh... Na ja, de singt eben geern. Un dat is ja uk wat Besünners, wenn man dor bi so'n groot Event mit bi is; mit Musicalstars, Symphonieorchester, een Rockband, un denn in de grooten Hallen över heel Düütschland verdeelt. Dat is al wat.

Anita: Seker, dat spöölt bestimmt en Rull. Dor sünd seker mennigeen Skuren över't Leven lopen. Obber meenst nich, dat dor noch mehr achter schuult? Dat ji as Katholiken middlerwiel doch dat een of anner för Luther un dat, wat he wull, över hebben.

Heinrich: Kloor, dat de Kark, dat beiden Karken, hen un her maol nahfragen mäöt, of se noch up 'n richtigen Padd sünd, dor het he wiss recht mit hat.

Anita: Ik mutt uk an dat denken, wat Bundeskanzler Adenauer mal seggt he. De weer ja kathoolsch. "Also, wenn ik domals Papst west weer", het he seggt, "denn weer mit dat mit de Reformation nich passeert. Ik harr mi de Luther mal komen laten. Dat weer doch'n heel vernünftigen Keerl!"

Heinrich: Na ja, is ja nich verkehrt, wat he seggt hett. Dat wi immer weer den Dreih kriegen mäöt nah dat, wat wirklich wichtig is.

Anita: Dat het man uk bi dat Luthermusical murken. Dor gaff dat so Schlagers, de all ut volle Bost mitsingen kunnen: Selber denken! Wir sind Gottes Kinder! usw. Dor weern sük all eenig, Evangeelschen un Katholschen un uk de, de anners gor nix mehr mit d' Kark an d' Hoot hebben: Dat is wichtig, dor kummt dat drup an.

Heinrich: Dat stimmt! Tosaomen mäöt wi doch weer un weer anfangen, Gott sien Böskup in use Welt to drägen, so dat Mensken ehr verstaoht.

Anita: Dat seh ik uk so: De Fraag, of wi Gott sien Leevde wiederseggen un wiedergeven an de Minschen in disse Welt, de steiht doch över all uns Gewohnheiten un uns Oort, uns Glöven to leven. Uk över all Unnerscheden.

Heinrich: Se helpt us, use Karken immer weer to reformeern in den Geist van disse Leevde. Dor harr Luther recht.

Anita: Süchst woll! "Christenlüüd, de beden, sünd de Säulen, de dat Dack van disse Welt dragen", het Luther mal seggt. Un ik würr uk seggen: "Christenlüüd, de mit'nanner van Gott sien Leevde singen, helpen disse Welt mit all hör Sörgen een Stapp wieder."

Heinrich: Dor kann ik as Katholik bloß noch Ja un Amen to seggen!


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


23.4.2017


na baven