Dat kannst mi glööven!
De ökumenisch Appelboom

vun Pastorin Anita Christians-Albrecht un Heinrich Siefer


To'n Anhören hier klicken:


Lesen doot de Verfaters.


Heinrich: "Uk wenn ik wüss, dat mörgen de Welt unnergeiht, dö ik vandaag noch een Appelböömken planten."

Anita: Heinrich, wo kummst du dann to disse Sprökje? Dat het doch Martin Luther seggt — un du büst doch kathoolsch!

Heinrich: Dat kennt doch bold jedeen. Is ja meist so wat as een Motto för aal de veelen Koppels, de sik üm de Natur un de Tokunft van use Eern of üm dat Elend in use Welt sörget. Un veele wätet wisse gor nich, dat dat van Martin Luther is.

Anita: Kann wäsen. Man för mi is dat typisch Luther. Dor stickt ganz vööl Totroon binnen. To dat Leven un to Gott. Un veel Toversicht. Een bäten wat trotzig klingt dat. Mag de Welt uk unnergahn, ik glööv faste, dat dat nich dat Enne is!

Heinrich: Un dat gefallt mi an Luther, uk wenn ik kathoolsch bün. Mit beide Feute up de Eern. Un liekers kikkt he in'n Himmel un troot Gott gewaltig wat to — uk dor, wor 't bold so schinnt, as wenn 't all vörbi is. Dat is echt stark. Dat maakt Mensken Moot, den Kopp nich hangen to laten, wenn 't eis maal rundümto pickendüüster utsüht. Dor stammpt een mit 'n Faut up un seggt: Wat uk passseert! Ik höör nich up, an 't Leven to glööven!

Anita: Jo, mi gefallt dat Bild van de löttje Appelbom uk gewaltig good. Een Appelboom planten heet: Hopen! Dat Leven geiht wieder. Dat gifft'n neien Anfang!
Heinrich: Een Appelboom planten meent uk: Kiek nich bloß up dat, wat du nu jüst vör Oogen sühst. Kiek över dien lüttke Leven rut.

Anita: Een Appelboom planten, dat meent uk: Ik sett een Teken, dat alle seihn köönt. Een Teken, dat van Leven, Wassen un Bleuhen vertellt.

Heinrich: Dann is 't uk kien Wunner, dat Luther sien Spröksken van all de geern upgrepen worn is, de sik för de Ümwelt un för 't Bewohrn van de Schöpfung insetten doot: Planten, wassen, grönen un blaihen — een fein Beld för dat Hopen up een beter Welt.

Anita: För alle Minschen.

Heinrich: Ja, för alle Minschen. Un dat heet ja eegentlich uk dat Woord ‚kathoolsch' — alle Minschen in de heele Welt. Alle Mensken in use Welt sittet tosaame in een Boot, un wi sailt mitnanner dör de Tied. Konfession un Religion spält dor kien Rull. Dat Mit'nanner un För'anner instahn steiht an eerste Stäe
Anita: Na ja, tomindst hebbt wi den glieken Stüürmann in us Boot — egal of evangeelsch of kathoolscHeinrich Eegens mussen wi beid nu bigahn un een Appelboom planten.

Heinrich: Een ökumenischen Appelboom! Dat weer wat!


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


26.3.2017


na baven