Ik böög mi vör dien Krüff in'n Stall

"Ich steh an Deiner Krippen hier"
Text: Paul Gerhard
Plattdüütsch: Peter Schütt
Melodie: Johann Sebastian Bach

Ik böög mi vör dien Krüff in'n Stall,
o Jesu, du mien Leven,
ik kaam un bring un geef di't all,
wat du för mi hest geven.
Dörch dien Leev bün ik, wat ik bün,
Hart, Lief un Seel, de nehm du hen
Un laat't dien egen blieven.

As ik noch nicht geboren weer,
dor weerst du mi geboren.
as ik noch to de Welt nich höör,
leeg deep in Nacht verloren,
dor hest du al dien Hand herdaan
un mi towiest de rechte Bahn,
dat ik sull to di kamen.

Ik stah un seh mit Dank di an,
kann nich dat Wunner faten
un will doch, wat ik faten kann,
nich ut mien Ogen laten.
O dat mien Sinn di ganz verstünn
un sik mien Seel dää to di hen,
sik ganz in di to bargen.

Dat een doch, bitt ik, wullt du mi,
mien Heiland, alltiet geven,
dat ik mien Leven frie mit di
mien todacht Daag mag leven:
Laat mi dien Fründ un Broder ween,
as du uns Vaddergott sien Söhn,
de uns mit Namen ropen.