To 'n 70. Geburtsdag

vun Brigitte Fokuhl


Mit söbentig is een noch nich olt.
Een is je fast as Ekenholt,
geiht in't Theater, graavt in'n Goorn
un hett ok süss wat üm de Ohrn.
Un kümmst du doch mal ut de Puust'
un hest up wieder gor nix Lust,
denn roh di ut, sie man nich bang,
treck Puschen an, de Been maak lang
un sett di nich to Dull in'n Draff.
De Minsch, de kann nich allens af.
Doch söök di man wat Godes rut,
so süht de Welt ok fründlich ut.
Du hest doch Tiet, drum nütt se goot.
Nimm di den Schirm, sett up dien' Hoot.
Gah mal to Stadt un kiek di üm,
dor is wat los, dor löppt wat rüm.
Gah in't Café un sett di dal,
dit is je nich dat eerste Mal.
Bestell di Koken un nahst Sekt.
Wat meenst du, wat di dat schöön smeckt!

Proost!


Tau'n Anhören hier klicken:


Lesen deit Brigitte Fokuhl in Holsteiner Platt.



na baven